Poesie > poesie dell'autore
U marinaru
Picciutteddu mi piacia
viriri ammuttari i varchi e' marinara.
Quannu stava pi scurari
i marinara ammuttavanu i varchi
pi iri a mari.
I taliava e mi paria na festa.
Tutti cu li cavusi arrunchiati,
cu' na giacchetta mala cumminata
e cu' la truscitedda
cu' dintra picca pi manciari,
pi la notti nun moriri di fami.
S'alluntanavanu vugannu
cu grossi rimi, vuciannu e cantannu
comu siddu era na prucissioni
pi iri o santuariu.
Li taliava e mi nni priava:
tutti cu li coppuli
e li birritti cu lu giummiddu
di lana.
Parivanu a rapprisintanza di Siciliani
du gurfu di mari azzurru
ca paria un mantu di carità.
Ca di varchi dintra du mantu
n'era filici puru u mari.
Ora sunnu tutti muturizzati,
cu li tuti e li stivali,
cu la radiu e lu scanagghiu,
ca riti a strascinu
comu scava funnu.
Ca lu mari chianci:
chistu nun è piscari,
chistu è ammazza mari.
Ca nun c'è cchiù piaciri
a taliari i marinara.
Comu mi mancanu i marinara
cu la coppula
e i birritti,
cu lu gimmiteddu i lana
e pedi nudi, cu li causi arrunchiati.
Chisti eranu i marinara siciliani.