Poesie > poesie dell'autore
A Gnaziu Buttitta
Criscivu no paisi
'nsemmula cu tutti l'autri picciotti,
comu siddu eramu figghi
di la strata.
Cu lazzu e la strummula
'nta l manu
tutti sapianu girari
a strummula,
ma Gnaziu nun si cuntintava
di fari girari a strummula:
iddu facia girari u ciriveddu.
U so pinseri vulava,
vulava, comu l'aceddi.
Ansiusu di purtari
i so pinseri 'nta la testa
di la genti,
i so pinseri, ricchi d'amuri
e di puisia.
E cu la forza e lu so curaggiu
lu purtarunu ne la menti
di tantissima genti.
Purtannu armonia ca so puisia,
ca mi sentu urgugliusu
di essere bariotu comu a tia.
La natura a l'omu
ci detti u tortu:
ca cu l'anni squagghiamu
comu na cannila di cira.
Ma lu scrittu,
lu scrittu e a puisia
nun morinu mai.
Nun è na cannila
ca s'astuta e nun fa
cchiù lustru.
Lu scrittu e la poesia
sunnu sempri
ne la menti di la genti,
finu ca esistinu no munnu.