Poesie > poesie dell'autore
Amicu suli
M'arruspigghiu
cu lu cantu di l'aceddi,
ca mi pari 'na sinfunia.
M'affacciu a la finestra
sbarrichiata
e pigghiu 'na vuccata d'aria
frisca.
U me cori è cuntenti
pi n'autru jurnu chi cumincia.
Taliu lu mari lutanu
e viu u suli
comu calici isari.
Quannu di luci
si inchi lu celu,
sentu arrivari lu so caluri
e mi sentu chinu di carizzi,
comu picciriddu aggucciatu
nna lu pettu di la matri.
Oh, chi natura fici lu Signori,
cu la terra, lu mari, e li cristiani
e lu suli ca cci duna lu caluri.
'Nta stu munnu
avissimu a essiri felici,
senza lu scantu
di chiddu chi pò succediri
dumani,
ma quannu viu lu suli
tramuntari,
lu taliu e mi pari stancu comu
a mia.
La sira, prima di durmiri,
pensu a li guerri e a li malatii
e pregu lu Signuri
pi dumani rividiri
stu granni amicu miu suli.