Poesie > poesie dell'autore
U niscituri di balatuna
Ne' pirreri
ognunu havia u so spicificu misteri.
Lu mastru ca tagghiava cu picuni,
e chiddu cchiù scarsu arrifunniva
ca mannara,
chiddu ca era mastru cchiù finu
facia u scippaturi di balatuna
e li scquatrava:
era chiamatu u battituri.
'Nta stu misteri du pirriaturi
nun n'era cunsidiratu u niscituri,
ca ncoddu si nisciva i balatuna.
Era cunsideratu u mulitteri.
Cu balatuni 'ncoddu
acchianava e scinniva
comu u mulu attaccatu a sena.
Cchiù lu quatru da pirrera scinniva,
cchiù aumintavanu i scaluna
ca du poviru niscituri
acchianava da scala
cu la lingua stritta tra li denti,
ca quannu arrivava na trazzera
cu du balatuna supra a spadda
ci trimavanu i gammi.
Si isava l'occhi 'ncelu dicennu:
-Patritennu nun fui iu a mettiri
lu Signuri 'nta cruci.
Nun ti basta ca sugnu puvireddu?
'Nca picchi haju a purtari sta cruci?
Ca cu chiddu chi mettu 'nta la pansa
nun sacciu si dumani iu c'iagghiornu.