Poesie > poesie dell'autore
Lu furnu a ligna
Avia tridici anni
e nni mustrava vinti,
'ndrucchiulutu di friddu
e di travagghiu.
Da la casa a la pirrera
c'eranu du mugghia.
Tutti li matini
passava di lu furnu.
Ricordu si camiava cu la ligna
accattava lu vastidduni
cavuru cavuru
e mi li pizzuliava comu
l'aceddi,
manciava crusta e muddica,
lu ciavuru facia di
cumpanaggiu.
Ora lu pani di la matina
diventa umma la sira,
ma quannu mi veni lu spinnu
vaiu a Baria
unni c'è lu furnu a ligna.
M'accattu lu vastidduni,
mi lu mettu sutta la scidda
e, passu dopu passu,
mi lu pizzuliu.
Mi sentu di turnari
nne matini, sutta l'acquazzina,
cu lu ciavuru di pani
di li furna a ligna.